தேடிக் கொண்டிருக்கிறேன்
எனக்கே எனக்காக
ஒரு ஸ்பெஷல் புன்னகையுடன்
வளைய வரும் ஆத்மாவை !
கடைசி தினம் வந்தவர்களும்
அப்படித்தான் சொன்னார்கள் ...
மறக்க முடியாமல் செய்து விட்டு
மறைந்து போன ஒரு ஜீவன்
இனி நினைவுகளால் வாழும்
நினைவுகளும் மரணிக்கும் வரை!
அத்தனை மனிதர்கள்
நிறைந்து கிடந்த
வீட்டை வெறுமையாக்கும்
சாதுர்யம் அந்த புன்னகைக்கே
சாத்தியமானது !
எதுவும்
சொல்லாமல் போய்விட்டாய் என்று
குறை சொல்ல முடியாது
வந்து விசாரிக்கும் மனிதர்கள் அத்தனை பேரும்
சொல்கிறார்கள்
நான் கற்றுக் கொள்ள வேண்டியவைகளை!
இருந்தபோது தொலைத்து விட்டேன்
இழந்தபோது தெரிந்து கொண்டேன்
உன் புன்னகையின் பெருமை !
